12年曼聯生涯結束　菲爾鍾斯今夏離隊

足球博彩神器，每日重心提供盡在《彩報》：http://win.on.cc/football/　

「費Sir時代」遺臣又將會少一人，英國傳媒指曼聯已經決定唔同後衞菲爾鍾斯續約，意味呢位前英格蘭國腳將於今夏約滿，以自由身離隊，結束12年紅魔鬼生涯。

現年31歲嘅菲爾鍾斯2011年被當時紅魔主帥費格遜簽入，由布力般流浪加盟曼聯，原本表現唔錯，但其後受傷患問題困擾，長期缺陣，上季僅5次披甲，今季更加未曾上陣，換言之佢已經有1年時間冇參加比賽。

曼聯領隊坦哈格亦早已經放棄呢位「玻璃腳」，干脆等菲爾鍾斯今夏約滿「自然流失」，由於佢太易受傷，脫魔之後會唔會繼續球員生涯，實屬疑問。

除咗菲爾鍾斯之外，另一位曼聯後衞杜安薛比亦不獲續約，同樣將於今夏約滿離隊，呢位25歲守將近年大部份時間被外借去阿士東維拉，上季被外借去拿玻里，今年1月被外借去英冠球隊史篤城，但佢勝在仍然年輕，應該仲有機會翻身。