熱刺將請普斯迪高路　球迷群起反對

足球博彩神器，每日重心提供盡在《彩報》：http://win.on.cc/football/　

英超勁旅熱刺炒干地3個月後，帥位終於有着落，據英國《太陽報》報道，熱刺最快下個星期會正式聘用些路迪主帥普斯迪高路，不過呢位澳洲教頭未上任已經被嫌棄，大批熱刺球迷網上發動「向普斯迪高路說不」運動，認為佢唔夠班教熱刺。

報道指熱刺經常連番斟介觸礁後，終於同普斯迪高路「情投意合」，熱刺新足球營運總裁梅恩亦係澳洲人，對「自己友」普斯迪高路特別欣賞。57歲嘅普斯迪高路同些路迪係每年續1年約，所以熱刺唔需要付出巨額賠償。些路迪周日(4日)凌晨會踢蘇足盃決賽，已贏蘇超同蘇聯盃嘅普斯迪高路，有望為球隊實現「3冠王」。

雖然些路迪成績突出，不過熱刺球迷對普斯迪高路仍然唔太信任，認為佢之前教日職、澳職同蘇超都只係二線聯賽，佢嘅級數同其他傳聞目標拿高斯文、安歷基等有一段距離，所以網上發動「向普斯迪高路說不」運動，獲唔少球迷響應。