韋斯咸勝利巡遊　班主宣布迪格蘭賴斯轉會

最強博彩盤路過關神器《串績王》：http://win.on.cc/football/　

新鮮出爐歐協聯冠軍韋斯咸，周五(9日)喺倫敦舉行巴士巡遊，同數萬球迷慶祝球隊58年來首個歐洲賽事冠軍，同時亦係隊長迪格蘭賴斯嘅歡送儀式，韋斯咸班主大衞蘇利雲證實，球會已經同意迪格蘭賴斯夏天轉會。

韋斯咸大軍帶住歐協聯獎盃由捷克飛返倫敦後，隨即轉上開蓬巴士由舊主場烏普頓公園駛去市政廳，沿途有數萬球迷一齊慶祝，領隊莫耶斯同隊長迪格蘭賴斯就最受歡迎，不過迪格蘭賴斯就即將同效力9年嘅韋斯咸道別。

韋斯咸班主大衞蘇利雲證實：「我哋答應畀賴斯離隊，佢去意已決。今季冇一個人畀佢更加投入，我哋應該如佢所願，呢個唔係韋斯咸想見到嘅結果，我哋1年半前開20萬鎊(約197萬港元)周薪畀佢，但佢拒絕，你唔能夠夾硬留低一個想走嘅人。」據報阿仙奴日內會開價9,200萬鎊(約9.05億港元)收購迪格蘭賴斯，相信成事機會唔細。