坦哈格秘斟舊部　睇中非洲加度素

足球博彩神器，每日重心提供盡在《彩報》：http://win.on.cc/football/　

簽入奧拿拿後，坦哈格又準備簽另一舊部，就係效力費倫天拿嘅摩洛哥中場蘇夫恩岩拉伯特，佢外號「非洲加度素」，電視台譯做「安拉拔」，坦哈格喺執教烏德勒支年代曾同佢合作，消息指曼聯正秘密斟介。

坦哈格執教曼聯後，已先後簽入安東尼馬菲奧斯、利辛度馬天尼斯，仲有已在陣中嘅雲迪碧克，都係佢前阿積士舊部，加埋近日簽入嘅門將奧拿拿，依家曼聯有4個前阿積士球員，至於坦哈格睇中嘅蘇夫恩岩拉伯特，就係佢執教烏德勒支年代嘅球員。

坦哈格曾於2015至17年執教烏德勒支，蘇夫恩岩拉伯特喺該隊出道，雙方曾合作兩季，近日「安拉拔」同尚餘一年約嘅費倫天拿達成協議，決定今夏離隊，轉會費標價1,900萬鎊(約1.9億港元)，意大利傳媒報道，雖然曼聯同費倫天拿之間未有任何協議，但交易朝着正確方向推進，球員亦願意再同坦哈格合作，因此成事機會唔低。