根度簡未能註冊　隨時離開巴塞

最強博彩盤路過關神器《串績王》：http://win.on.cc/football/　

巴塞隆拿今夏免轉會費簽入曼城中場根度簡，以為執到寶，但隨時得而復失，根據西班牙《阿斯報》爆料，巴塞隆拿因為資金問題，計唔掂數，無法為根度簡註冊，據悉如果呢位32歲德國國腳未能趕及香港時間8月12日凌晨西甲開鑼前註冊，佢就會選擇離隊。

巴塞隆拿近年陷入財困，加上球員薪酬超出西甲賽會上限，以往都曾經發生球員未能註冊嘅問題，今季又再歷史重演。西班牙傳媒指巴塞正在全力「搶救」根度簡，準備出售翼鋒奧士文尼迪比利，呢位法國國腳可能轉投巴黎聖日耳門，中場基斯爾亦會被賣走，呢位26歲科特迪瓦國腳已同意去沙特阿拉伯搵食，加盟吉達艾阿里，簽約3年，轉會費為1,500萬歐元(約1.3億港元)。

巴塞以往遇上球員註冊問題，都可以逢凶化吉，相信今次都應該可以大步檻過。