巴塞清貨　費倫托利斯或重返英超

西甲冠軍巴塞隆拿近年一直備受財困問題影響，會方計劃今夏出售部份表現未如理想嘅球員，騰出薪酬空間為新兵註冊，翼鋒費倫托利斯成為清洗目標，會方願意以4,000萬歐元(約3.4億港元)出售呢位23歲西班牙國腳，阿士東維拉、紐卡素有意接貨。

巴塞隆拿2021年12月底以5,500萬歐元(約4.7億港元)向曼城收購費倫托利斯，但不獲重用，其中上季西甲雖然上陣33次，但只有14次擔任正選，射入4球及2次助攻。巴塞方面唔想留住1位「貴價後備」，希望將佢出售套現，令球會有資金周轉，所以甚至不惜去蝕本價4,000萬歐元大平賣。

不過，只有少數來自英超嘅球會有興趣簽入費倫托利斯，包括阿士東維拉、紐卡素，但並未正式出手，似乎認為巴塞有機會再減價。

費倫托利斯喺早前熱身賽大踢爭氣波，包括對阿仙奴、皇馬、熱刺都取得入球，或者有助巴塞「出貨」。