愈貴愈好？禾特普斯夢幻處子戰獲讚「超值」

韋斯咸喺英超主場3比1打爆車路士，掛住「英超史上最貴球員」頭銜嘅摩西斯卡些度，地標戰輸12碼兼輸波，相反「錘仔幫」用3,000萬鎊(約3億港元)收購嘅禾特普斯，首演即交出2次助攻，獲一致大讚係「超值」收購。再次證明轉會費多少唔係問題，最緊要係啱唔啱用。

韋斯咸夏天以1.05億鎊(約10.5億港元)賣走迪格蘭賴斯，球隊決定向修咸頓簽禾特普斯做代替，佢今場先用角球助攻開紀錄，下半場再交長傳畀米查利安東尼奧入波，成為韋斯咸史上首個「地標戰」交2次助攻球員，領隊莫耶斯賽後表示：「我覺得佢性格同迪格蘭賴斯相似，係人都知佢交波勁、助攻多，佢喺韋斯咸有個好好嘅開始。」

英國球評家對禾特普斯亦讚不絕口，艾殊利高爾話：「禾特普斯得到嘅肯定唔夠多，佢係非常特別嘅球員，肯定可以令韋斯咸更進一步。」列納亦表示：「禾特普斯好有才華，佢嘅傳送係世界級，逼搶都係一流，你睇佢只係需要3,000萬鎊轉會費，簡直係超值收購。」