利物浦又輸？曼城截劫狼隊中場

利物浦今夏增兵極不順利，已經喺球員爭奪戰中3度敗陣，嚟緊可能有第4次！紅軍斟介多時嘅狼隊中場馬菲奧斯紐尼斯，近日答應曼城邀請加盟，轉會費同利物浦開出嘅一樣係5,000萬鎊(約5億港元)，藍月為免夜長夢多，想喺48小時內落實交易。

利物浦陣容大換血，今夏已簽入阿歷斯麥亞里士打、蘇保斯拉爾同遠藤航，但都未夠，佢哋最想要嘅祖迪比寧咸揀咗皇馬，摩西斯卡些度同羅美奧拉維亞又被車路士截劫，近日全速斟介馬菲奧斯紐尼斯，但又可能臨門一腳輸畀曼城，認真當衰。

轉會專家羅曼諾報道，24歲葡萄牙國腳馬菲奧斯紐尼斯已經答應曼城嘅個人條件，同意加盟，曼城向狼隊開出5,000萬鎊轉會費，只要狼隊接受就可完成交易，曼城同時向雷恩斟介比利時新星謝利美杜古，轉會費6,000萬歐元(約5.1億港元)，希望喺轉會窗關閉前，搞掂兩單轉會。