曼聯小將外借英冠　師徒重逢

曼聯青訓小將班頓威廉斯搵到新東家，就係外借到英冠榜首球隊葉士域治1年，合約中包含買斷條款，該隊主帥基蘭麥堅拿係前曼聯青訓教練，亦係班頓威廉斯青訓時期教練，葉士域治官網亦以「重逢」來形容。

坦哈格上仗不敵熱刺後，已表明班頓威廉斯同雲迪碧克可以離隊，雲迪碧克未有着落，班頓威廉斯立即獲葉士域治接收，原來葉士域治同曼聯關係千絲萬縷，主帥基蘭麥堅拿、助教李爾格蘭等人都係蘇斯克查年代曼聯教練團成員。

班頓威廉斯表示：「基蘭麥堅拿係我青訓時期教練，我哋有良好聯繫，佢具備頂級教練思維，能夠解決問題，佢對我影響好大，我相信佢。」

由於班頓威廉斯曾外借諾域治，依家又外借到葉士域治，兩支球隊為宿敵關係，因此今次轉會，引發諾域治球迷強烈不滿，揚言要清算呢位「叛徒」。