曼城青訓成金礦　「賣仔」勁袋4.4億鎊

富可敵國嘅曼城多年來都係轉會大戶，不過佢哋吸金能力同樣唔可以睇小，尤其青訓系統多年來賣走唔少勁人，連同高爾彭馬將以4,500萬鎊(約4.5億港元)過檔車路士，統計顯示曼城喺哥迪奧拿任內，單係青訓「賣仔」已收入超過4.4億鎊(約44億港元)！

曼城近年收購各地潛質新星，再喺青訓系統「加工」轉手，效果非常明顯，依家唔少貴價球星都喺曼城青年軍受過訓練，包括羅美奧拉維亞(車路士)、巴謙戴亞斯(皇家馬德里)、杜格拉斯雷斯(阿士東維拉)、查頓辛祖(曼聯)、柏度樸路(熱刺)等等。

曼城今個夏天「賣仔」又大賺一筆，除高爾彭馬天價轉投車路士外，較早前亦將英格蘭U21門將占士查科特以1,500萬鎊(約1.5億港元)賣去般尼，19歲中場舒亞查里斯以1,000萬鎊(約1億港元)改投修咸頓，葡萄牙小將卡路士波基斯亦以1,200萬鎊(約1.2億港元)轉會阿積士。