【官宣】韋拿杜姆投伊蒂法克　重組紅軍中場

歐洲主要聯賽轉會市場關閉，不過沙特阿拉伯球會喺今個月20號前仲可以繼續買人，由謝拉特領軍嘅伊蒂法克，周日(3日)宣布簽入荷蘭中場韋拿杜姆，重組佐敦軒達臣+韋拿杜姆嘅昔日「紅軍中場組合」。

32歲嘅韋拿杜姆2年前由利物浦轉投巴黎聖日耳門(PSG)，可惜表現未如理想，上季被外借去羅馬亦甚少上陣，PSG早已決定將佢賣走，原本阿積士同燕豪芬都傳出對佢有興趣，但最終謝拉特出手成功帶佢去伊蒂法克，簽約3年。

韋拿杜姆同佐敦軒達臣喺利物浦合作過5年，一齊贏過歐聯同英超冠軍，今次喺沙特重逢令球迷勾起無限回憶。伊蒂法克今個夏天除咗簽「紅軍孖寶」之外，仲收購蘇格蘭守將積亨特利同法國前鋒穆沙迪比利。