沙特繼續搶人才　卡拉斯高加盟

歐洲轉會窗已關閉，但沙特聯賽嘅轉會窗仍然運作，佢哋繼續向歐洲招攬頂級球星，最新一個係馬體會比利時國腳恩歷克卡拉斯高，球員周一(4日)抵達沙特，將會同沙特球隊艾沙比Al Shabab簽約3年，轉會費1,500萬歐元(約1.27億港元)。

馬體會原本今輪西甲對西維爾，但因天氣惡劣取消，卡拉斯高亦喺賽事改期之下結束馬體會生涯，喺佢出發去沙特之前，已經簽齊所有轉會文件，體檢亦都做埋，剛飛抵沙特，獲得當地沙特酋長迎接。

30歲嘅卡拉斯高生涯大部份時間都喺馬體會，2018至20年期間曾經轉戰中超兩季，之後又回流馬體會，兩段時期合共上陣265場射入47球，由於佢踢過中超，今次再轉到另一亞洲聯賽沙特，對佢嚟講駕輕就熟。