癲咗！沙特報價21億簽沙拿　周薪4,900萬

歐洲轉會窗關閉，不過利物浦能否留住穆罕默德沙拿，仲要睇多幾日，沙特豪門伊蒂哈德日前派代表到利物浦，面談沙拿轉會事宜，報價破世界紀錄嘅2.15億鎊(約21億港元)，周薪亦係世界紀錄嘅500萬鎊(約4,925萬港元)。

多間傳媒報道，利物浦喺死線日拒絕伊蒂哈德1.5億鎊報價，以為事情已結束，但伊蒂哈德並未放棄，仲派專人到利物浦跟進交易，開出2.15億鎊轉會費、周薪500萬鎊嘅條件，舉世矚目。

消息傳出後，球迷已經唔再抗拒沙拿離隊，反過來有更多球迷支持利物浦出售沙拿，《太陽報》網上投票，有超過75%民意支持出售沙拿，普遍觀點認為，紅軍應出售超過30歲嘅沙拿，再用巨額資金進行重建。而且沙拿喺沙特一年薪金所得，等於喺利物浦踢20年，放走佢對大家都好。