坦哈格被質疑收回佣　曼聯內部感憂慮

曼聯輸波後負面消息不絕，傳出球員內訌不久，又有英國傳媒爆料，指領隊坦哈格頻繁參與買賣球員，相關交易出現大幅溢價，引起曼聯內部憂慮，矛頭直指坦帥從中得益。

英國《每日郵報》爆料，坦哈格入主曼聯後，球探部門重組，又與經理人公司SEG合作，坦帥兒子就喺該經理人公司擔任分析師，近日簽入海倫同出售小將伊巴爾，都係該公司手筆。

除咗經理人公司，坦帥近兩季不斷簽入舊部，利辛度馬天尼斯、安東尼馬菲奧斯、奧拿拿、蘇夫恩岩拉伯特等，而且收購價貴過市價好多，原本曼聯內部對此隻眼開隻眼閉，領隊買自己信任球員好正常，以前費格遜都係咁，但依家踢得差，內部立即提出質疑，懷疑坦帥有收受回佣之嫌。

雖然曼聯官方為內訌傳聞闢謠，亦發動公關為坦哈格頻繁參與轉會傳聞洗白，但如果球隊再輸落去，負面消息只會愈嚟愈多，最後又要換帥重頭嚟過。