利物浦黑氣纏身　入波功臣加普受傷

利物浦上仗英超除咗因為VAR連番誤判，導致1比2不敵熱刺之外，仲有前鋒加普受傷，可能缺陣一段時間，加上另一位前鋒迪亞高祖達、中場居迪斯鍾斯被罰紅牌，需要停賽，令球隊雪上加霜。

加普踢完上半場就被換走，賽後領隊高普表示，呢位荷蘭國腳受傷：「加普傷勢可能唔輕，我仲要再了解，佢入波前已經被對手整傷，入波後感覺更加痛楚，需要戴上保護器具行路，我哋已經因為紅牌失去2位球員，可能冇埋第3個。」

利物浦將於周五(6日)凌晨歐霸盃主場對聖基萊斯聯，預料會以副選出戰，跟住英超作客白禮頓，紅軍人腳不整之下，肯定面臨重大考驗。