加普缺陣數周　或無緣默西賽德郡打吡

利物浦前鋒加普上仗英超對熱刺，射入1球之後不幸傷出，英國《太陽報》引述荷蘭傳媒報道，指呢位24歲射手需要休息數星期，無法為荷蘭出戰10月中2場歐國盃外圍賽，甚至可能缺陣10月21日晚英超「默西賽德郡打吡」主場對愛華頓。

加普當時被換離場之後，需要包紮膝部，主帥高普已經擔心呢位荷蘭國腳傷勢唔輕，荷蘭記者艾芬克喺社交網爆料，指加普將休戰數星期，荷蘭未來2場歐國盃外圍賽對法國、希臘，都唔使預佢。利物浦10月仲有5場比賽，包括對同市宿敵愛華頓，恐怕加普未必可以披甲。

利物浦將於周五(6日)凌晨歐霸盃主場對聖基萊斯聯，預料會以副選出戰，但跟住英超作客白禮頓，除咗加普養傷之外，仲有居迪斯鍾斯、迪亞高祖達停賽，人腳不整之下隨時有失分危機。