真係多謝晒！英格倫今季禁參與紅軍賽事

熱刺對利物浦出現嘅「VAR醜聞」，令英超球證水平再受質疑，該仗VAR球證英格倫更成為眾矢之的，不過據英國《每日電訊報》報道，英國職業裁判員公司(PGMOL)主席韋比決定攬英格倫，唔會將佢炒魷，只係「罰」佢今季唔能夠參與利物浦比賽嘅執法。

英國《每日電訊報》消息指，出事嘅VAR球證英格倫同曲克，都被踢出今個星期英超賽事執法名單，「大拿拿」損失價值1,200鎊(約1.2萬港元)執勤費，但韋比就決定唔會將英格倫炒魷，只係「今季內不得參與利物浦賽事執法」。

上季阿仙奴對賓福特一仗，VAR球證李美臣因「唔記得畫線」令阿仙奴痛失2分，事後PGMOL同李美臣達成解約協議，不過有消息指李美臣喺8月份已重新獲聘，擔任球證培訓工作，韋比對佢班下屬果然「關照」。