法明奴出自傳　11.9開售

羅拔圖法明奴今夏約滿離開利物浦，轉投沙特阿拉伯球隊吉達艾阿里之後，除咗踢波之外，原來仲籌備出自傳。呢位32歲巴西前鋒正式宣布佢本自傳《Si Senor：我的利物浦歲月》將於11月9日開售，內容將大爆效力利物浦期間鮮為人知嘅秘密。

羅拔圖法明奴透過社交網為自傳做宣傳，佢話：「有一件事想講畀你知，好高興我本書《Si Senor：我的利物浦歲月》即將出版，我會喺書中同大家分享過去喺利物浦嘅經歷，呢本書將於11月9日出版，你可以預訂簽名版本。」結果非常搶手，簽名版本預訂名額已經迅速滿額。

羅拔圖法明奴曾經效力利物浦8年，上陣362場，射入111球及79次助攻，協助紅軍捧過歐聯及英超冠軍等錦標，佢出自傳一定大受利物浦球迷歡迎，至於法明奴轉投隊吉達艾阿里之後，上陣9場入3球。