卡斯米路足踝受傷　曼聯調查「傷兵潮」原因

曼聯今季爆發大型「傷兵潮」，近日國際賽再又球員受傷，巴西中場卡斯米路上仗尾段被調離陣，領隊迪尼斯證實佢係足踝有問題，目前未知傷勢情況。由於今季有太多球員受傷，消息指曼聯已就「傷兵潮」原因展開調查。

巴西上場世盃外被委內瑞拉逼和1比1，尾段失波前曾一口氣換走卡斯米路等3人，迪尼斯表示：「卡斯米路足踝被踢傷，係佢自己要求被換走。」巴西周三(18日)會作客烏拉圭，目前未知卡斯米路趕唔趕得切復出上陣。

卡斯米路上年加盟曼聯後，只係試過停賽缺陣，從未因傷患問題缺席比賽，依家距離曼聯下場作客錫菲聯(22日)只有1個星期，卡斯米路踢唔踢到成為疑問。英國《每日郵報》報道，曼聯今季分別有16個球員曾經因傷缺陣，球會已就問題展開調查，睇下當中有冇特別原因，希望搵方法制止「傷兵潮」延續。