阿諾特遇恐怖車禍　幾乎喪命

利物浦後衞阿歷山大阿諾特日前遇上恐怖車禍，幾乎喪命，呢位25歲英格蘭國腳駕駛途中，路邊一支長40尺嘅高壓電線杆突然被強風吹至倒冧，阿諾特反應夠快，及時急扭軚避過，但仍然同公路另一部私家車發生碰撞，幸好身體並冇受傷，總算係不幸之中嘅大幸。

根據英國《太陽報》報道，當時天氣差，路面非常濕滑，突然刮起一股時速70英里嘅強風，將路邊一支長40尺嘅高壓電線杆吹倒，電線攔住公路。據悉當時阿歷山大阿諾特緊急煞車及扭軚，驚險避過障礙物，但佢部價值9萬鎊(約86萬港元)嘅黑色私家車，同另一部白色私家車發生碰撞，造成車頭損毀，阿諾特可以自行落車了解情況，另外一位肇事司機亦冇大礙。

英國近日受強風吹襲，已經造成3人死亡，阿歷山大阿諾特遇上車禍，幸好避過一劫，都算好彩。利物浦將於周六(21日)晚7時30分上演嘅英超「默西賽德郡打吡」主場對愛華頓，相信阿歷山大阿諾特仍然可以上陣。