奧雲有意收購車士打　同「死侍」打對台

威爾斯球會域斯咸，3年前被荷里活影星賴恩雷諾士同麥艾亨尼收購後，即時成為話題球隊。據英國《每日鏡報》報道，英格蘭傳奇前鋒奧雲亦唔執輸，打算收購域斯咸死敵球會車士打，向「死侍」賴恩雷諾士挑機！

域斯咸同車士打係「跨地域打吡」嘅死對頭，之前一齊踢地區聯賽，但域斯咸有明星班主加入兼升班後，人氣已經贏成條街，喺車士打出生嘅奧雲，亦打算拯救呢間家鄉球會，希望同域斯咸再鬥過。

奧雲表示：「我考慮買球會一段時間，車士打係我成長地方，自然係首選。我見到域斯咸依家出盡風頭，我都好希望車士打可以做到。做班主係一個燒錢嘅行動，我仲未富有到可以年年燒幾百萬，所以我要搵人幫手，如果有合適機會出現我就會郁手。」