【有片】典型紐尼斯！肉酸控球變超級金球
周四(2日)凌晨英聯盃第4圈賽事，利物浦作客2比1擊敗般尼茅夫，攻入致勝球嘅達雲紐尼斯今場好搶鏡，佢嘅入波更加充滿戲劇性，由滾水淥腳嘅肉酸控球，修正後再轟出超級靚波，唔少網民都話係「典型紐尼斯」演出──簡單嘅事唔識做，難度愈高做得愈好。
利物浦今場半力出戰，荷蘭前鋒加普31分鐘先開紀錄，不過拉唔開紀錄後，般尼茅夫喺64分鐘靠角球攻勢由祖斯甸古華特頂入追平。70分鐘紐尼斯接應阿歷山大阿諾特精彩長傳，幾乎即時可以單刀，但佢差勁First Touch竟然將個波控到九丈遠，差啲出埋邊線，現場般尼茅夫球迷出現大片喝采聲。
不過「天使版」紐尼斯及時出現，佢拎番個波修正後，單對單加速推入大位，右腳狂抽貼柱眉底入網。網上即時掀起熱話：「只有紐尼斯先可以有咁差嘅控球，然後射入世界波」、「典型紐尼斯入波」。利物浦領隊高普賽後亦表示：「紐尼斯顯示出佢嘅卡士，呢個入球係難以置信！」