國米皇蘇攜手出線　16強已誕生6隊

周四(9日)凌晨歐聯D組，皇家蘇斯達、國際米蘭一齊贏波，提早2輪攜手取得出線權，歐聯舉行完4輪分組賽之後，已經有6隊率先取得16強席位，西甲及德甲球隊最威水，各佔2席。

雖然皇家蘇斯達今季西甲表現欠佳，但踢歐聯非常醒神，今場贏得非常輕鬆，由米基爾馬連奴、奧耶沙巴爾、巴倫尼特斯亞各入1球，上半場21分鐘已經領先賓菲加3球，葡超球隊賓菲加只能靠拉法施華入波破蛋，無礙皇蘇贏3比1。

至於國際米蘭靠後備上陣嘅前鋒拿達路馬天尼斯85分鐘射入12碼，作客以1比0小勝薩爾斯堡，國米同皇蘇都有10分，第3位薩爾斯堡只有3分，賓菲加更加4戰全敗，可見呢組實力分野鮮明。

歐聯16強已誕生6隊，包括取得A組首名拜仁慕尼黑，另1支德甲球隊RB萊比錫亦取得出線權，西甲兩支「皇家隊」皇馬、皇蘇，以及上屆決賽球隊曼城、國際米蘭都出線。