壓倒沙拿！奧森漢膺非洲足球先生

非洲足球先生頒獎禮周二(12日)凌晨舉行，效力拿玻里嘅前鋒域陀奧森漢，成功擊敗利物浦球星穆罕默德沙拿同巴黎聖日耳門嘅阿舒拉夫當選，成為尼日利亞24年來首個得獎球員。

24歲嘅域陀奧森漢上季表現出色，帶領拿玻里重奪意甲冠軍，佢亦以26球成為神射手，喺早前金球獎選舉排名第8位，不過喺呢個非洲足協舉辦嘅頒獎禮就成功「登頂」。

尼日利亞對上一次有球員得獎，已經要數到1999年嘅阿仙奴前鋒簡奴，簡奴得獎嗰陣域陀奧森漢只係幾個月大嘅BB。域陀奧森漢下一個任務，就係要幫尼日利亞喺明年1月嘅非國盃爭奪冠軍。