駁唔到！高普寸爆：好彩簽唔到卡些度！

利物浦今季全面復甦，依家喺聯賽佔據榜首位置，領隊高普周二(11日)出席晏菲路球場新看台開幕儀式，同一眾利迷傾偈期間突然「寸王」上身，講到今個夏天轉會操作，直言簽唔到目標摩西斯卡些度同羅美奧拉維亞係「行大運」！

利物浦夏天重建中場，佐敦軒達臣、法賓奴、占士米拿同阿歷士張伯倫等相繼離隊，原本頭號收購目標係摩西斯卡些度，「紅軍」亦開價超過1億鎊搶人，結果最後關頭被車路士「截胡」，就連次選目標羅美奧拉維亞都被車路士搶走埋。最終利物浦簽入日本中場遠藤航同荷蘭中場賴恩格雲貝治。

高普喺晏菲路球場回答轉會問題表示：「夏天轉會發生咗幾件怪事，但我依家可以講『天呀！我哋行大運』！我哋當然知道有啲防守中場唔想加盟利物浦，結果係點大家都知，跟住我哋發現遠藤航，一個好出色嘅球員。當時我哋唔覺得(行運)，但依家對個結果好滿意。」