占美尼斯粗暴飛腳　馬高施華：唔應該紅牌！

周日(17日)凌晨英超，紐卡素主場3比0大炒富咸，今仗勝負關鍵係22分鐘，富咸前鋒魯爾占美尼斯起飛腳，雖然最後關頭已經「收腳」，但由於動作太肉酸而被VAR要求改判紅牌。富咸領隊馬高施華賽後批評球證偏幫紐卡素，直指魯爾占美尼斯唔應該被逐。

今場雙方鬥得肉緊，但唔少判決都係偏向主隊，22分鐘魯爾占美尼斯起飛腳，球證最初判黃牌，但VAR介入後改判紅牌。紐卡素踢多過下，下半場憑利維斯米利、米基爾阿米朗及丹般恩各建一功，大勝3比0完場。利維斯米利更以17歲229日之齡，成為紐卡素史上最年輕英超入球球員。

魯爾占美尼斯失控食紅牌成為輸波罪人，不過富咸領隊馬高施華就認為球證偏幫主隊：「頭21分鐘，球證冇判過紐卡素任何犯規，而佢哋每次都拎到罰球，明顯呢個球證唔夠經驗去應付主場嘅壓力，紐卡素冇1次犯規被罰，甚至拿修斯開肘打魯爾占美尼斯塊面都冇事！魯爾占美尼斯當時跳向對手，但冇任何嚴重嘅行為，黃牌係正確，VAR唔應該介入。」