湯馬士梅拿答應續約　效忠拜仁25年！

據德國《圖片報》報道，拜仁慕尼黑同明年約滿嘅湯馬士梅拿達成續約協議，將會續約1年至2025年6月，意味呢位傳奇前鋒將至少奉獻25年光陰畀呢間德甲豪門。

34歲嘅湯馬士梅拿今季失去主力位置，雖然各項賽事上陣18場，但只有7場係擔任正選，更多時間成為「通天佬官」或「後備殺手」，有傳湯馬士梅拿亦萌生去意，包括曼聯在內嘅豪門都有意簽佢，不過經教練杜曹挽留下，《圖片報》證明雙方已達成續約1年協議，預料下星期會正式官宣。

杜曹日前表示湯馬士梅拿仍然係重要一員：「梅拿好努力，佢知道球隊需要啲乜，而且可以勝任前場4個位置，梅拿絕對有資格成為正選。」據報湯馬士梅拿續約，王牌前鋒哈利卡尼最開心，事關呢位英格蘭國腳登陸德甲後，同湯馬士梅拿、利萊辛尼已成為老友。

湯馬士梅拿2000年加入拜仁慕尼黑青年軍，08年開始展開一隊生涯，為球隊上陣接近700場，入球超過200球，絕對係拜仁慕尼黑嘅Icon。