創造歷史！英超首次由女球證執法

周六(23日)晚英超，富咸主場0比2不敵般尼，原本戲碼一般，但創造歷史，首次由女球證執法，主角麗貝卡韋治繼2年前成為英格蘭男子足球聯賽首位女性主裁判之後，再進一級成為第1位主吹英超賽事嘅女球證，表現獲得好評，英超近年飽受球證誤判影響，麗貝卡韋治可能會帶來一番新景象。

現年40歲嘅麗貝卡韋治2010年開始兼職球證工作，2019年轉任全職，主要執法女子英超等女足賽事，2021年獲委任英乙哈洛格特對維爾港嘅球證，成為首位主吹英格蘭男子足球聯賽嘅女球證，依家再突破，做埋英超女球證，亦係英格蘭頂級聯賽成立135年以來，首次由女球證執法。

至於麗貝卡韋治第1次執法英超，富咸同般尼球員都好畀面，冇乜嚴重犯規，佢亦只出示3張黃牌，般尼憑威爾遜奧度拔、辛達貝治各入1球，贏2比0取得護級重要3分，難怪般尼領隊高柏尼賽後特別恭喜麗貝卡韋治創造歷史，歐洲足協亦喺社交網發文祝賀。