森林班主「色戒」　球員被逼換練波衫

近期表現直插谷底嘅諾定咸森林，希臘班主馬連拿基斯唔少決策都受到質疑。據《The Athletic》報道，馬連拿基斯原來仲有另類「色戒」，當佢每次到訪森林，都嚴禁出現綠、紫、黑3種顏色！

馬連拿基斯同時係希臘班霸奧林比亞高斯班主，死對頭彭拿典奈高斯波衫係綠色，報道指佢對綠色非常厭惡，甚至曾經下令森林將綠色嘅練習衫更換顏色。另外紫色同黑色都被馬連拿基斯視為惡運顏色，佢曾要求職員將訓練基地內嘅黑色相框、電視機都換成銀色，非常迷信。

諾定咸森林上季升上英超後，馬連拿基斯喺2個轉會窗合共簽入30個新球員，令球隊面目全非，最終僅僅護級成功，今季表現仍令人失望，早前宣布炒領隊谷巴，改聘葡萄牙主帥紐奴救亡。