後備奇兵補時絕殺　國米獲「半程冠軍」

周六(6日)晚意甲，榜首國際米蘭苦戰之下，靠後備上陣嘅大衞法迪斯補時3分鐘入波，加上對手最後關頭射失12碼，主場以2比1險勝維羅納，剛好完成一半賽程，力壓祖雲達斯，成為意甲「半程冠軍」。

國際米蘭上仗被弱隊熱拿亞逼和，意外失分，幸好射手拿達路馬天尼斯傷愈，趕及今仗復出，呢位阿根廷國腳不負所望，開賽13分鐘就入波，協助球隊領先。不過，國際米蘭遲遲未能拉開紀錄，踢到74分鐘更加被維羅納前鋒湯馬士亨利射入扳平1比1。

眼見國米即將失分之際，後備上陣僅10分鐘嘅大衞法迪斯，把握對手門將蒙迪普撲出不遠，近門補射入網，呢位意大利國腳入波之後，興奮到跳出大閘慶祝，被隊友扯甩條褲。

好戲在後頭，補時10分鐘，維羅納獲得12碼，點知入波功臣湯馬士亨利英雄變罪人，主射中柱彈出，國米可以全取3分，實在有運，難怪賽後全隊職球員都衝入場慶祝，好似已經捧盃。國米今季踢咗19場聯賽，領先踢少1場嘅第2位祖雲達斯5分，可以當作慶祝成為「半程冠軍」。