高圖爾斯復操　望季尾復出

皇馬收到好消息，養傷近半年嘅門將泰拔高圖爾斯近日已恢復單獨訓練，預料5月可以重返球場比賽，呢位比利時國腳重申唔會參加今屆歐國盃，並暗示國家隊已經唔需要佢，唔排除結束國際賽生涯。

泰拔高圖爾斯上年8月因為左膝十字韌帶受傷，需要接受手術，至今一直缺陣，根據西班牙電視六台報道，呢位現年31歲鋼門已可以進行單獨訓練，距離復出行近一大步，但估計都要等到5月先至可以參加比賽。皇馬現時2位副選門將阿列沙巴拿加、盧連表現不俗，相信教練安察洛堤唔會急於要求高圖爾斯復出。

泰拔高圖爾斯早前透露為咗以最佳狀態迎接下季賽事，唔會為比利時出戰6月中展開嘅歐國盃，佢近日接受訪問時，表示唔會改變決定：「即使我季尾復出，都100%唔會踢歐國盃，2018年世界盃係我哋奪取大賽冠軍最佳機會，近斯已經冇人同我傾返國家隊嘅問題，或者佢哋唔再對我有期望，雖然我想繼續為國家隊效力，但我已經唔年輕。」泰拔高圖爾斯言下之意，似乎想淡出國際賽舞台。