熱刺主帥拍心口　兩位新兵可出戰紅魔鬼

熱刺近日簽入2位新兵前鋒迪姆華拿、中堅達古辛之後，可望改善攻守人腳不齊問題，領隊普斯迪高路信心十足，揚言會派呢兩位新兵出戰周一(15日)凌晨英超作客曼聯。

普斯迪高路話：「據我所知佢哋兩人都可以上陣對曼聯，特別係達古辛上星期仲踢緊比賽，所以佢狀態非常好，至於迪姆華拿因為德甲歇冬，已經有一段時間冇參加比賽，但佢近7至10日都有操練，佢哋可以參賽，對於球隊係好事，畀佢哋盡快上陣，亦可以加迅融入球隊。」

熱刺踢完對曼聯之後，要等到1月27日凌晨先至再有賽事，對手係曼城，可以話係惡戰連場。