戴偉浚搏到爆缸都冇用　國足悶和黎巴嫩

【林卓臻卡塔爾多哈直擊】周三（17日）晚亞洲盃A組次輪賽事，中國雖然表現有所改善，戴偉浚更勇戰爆缸，不過「武球王」武磊依然忘帶射門鞋，最終打和0比0，連續2場互交白卷，尾輪仲要鬥東道主卡塔爾，出線機會唔樂觀。

由於雙方首輪都未能贏波，因此大家今仗都想力爭3分，上半場互有攻守，14分鐘國足中場戴偉浚爭波時被對方舉腳晒靴，鞋釘掂中佢塊面爆缸，但經VAR覆核後，球證未有出示紅牌。完半場前大家攻勢先至入肉，戴偉浚左路傳中，張玉寧同武磊連環施射，都過唔到黎巴嫩門將嘅十指關，之後黎巴嫩隊長馬特圖克遠射中楣彈出，半場互交白卷。

易邊後國足繼續施壓，不斷靠死球製造威脅，戴偉浚角球交畀老大哥張琳芃勁頂唔入，武磊接應罰球頭槌頂高，冇耐佢又近門失機，「武球王」同張玉寧呢對雙箭頭下半場差勁，之後被譚龍同林良銘入替，最終0比0和氣收場，國足今屆兩戰打和兼冇波入，下場仲要鬥卡塔爾，主帥阿歷山大‧揚科維奇真係要諗諗計喇。