阿仙奴成死球之王　秘「襪」被破解

阿仙奴今季進攻能力受到質疑，不過上場聯賽5比0大破水晶宮，就展現佢哋最強入球武器。阿仙奴憑2個角球入波後，成為今季英超死球入波最多球隊，有英國傳媒更發現，阿仙奴每次開角球前，都會由隊長馬田奧迪加特整體波襪嚟送出戰術密碼。

Opta數據顯示，阿仙奴今季有13個死球入波，當中10次靠角球攻入，2個數字都係英超之冠，阿仙奴嘅死球教練祖華居功至偉，佢同領隊阿迪達設計嘅多種單擋同企位戰術，上場就成功扯開水晶宮嚴密防線，而負責喺場上指揮用邊種戰術嘅人，就係隊長馬田奧迪加特。

前史雲斯中堅艾殊利威廉斯喺電視節目分析：「每套戰術都有個指揮，攻近柱定係遠柱，睇得出佢哋有晒部署。留意奧迪加特，每次角球佢都暗中發出訊號，每次佢都會企同一位置(禁區頂)整理波襪，係每次角球都係咁，你可以話係咁啱，但我相信呢個係阿仙奴死球戰術成功原因之一。」