紐卡素急散貨　向曼聯兜售哥林威爾遜

冬季轉會窗仲有唔夠1個星期就結束，罕見淡靜嘅英超球會亦準備「做嘢」，據報急於套現嘅紐卡素，已主動向曼聯等球會兜售英格蘭前鋒哥林威爾遜，而且「割價」只需1,800萬鎊(約1.8億港元)就有交易。

英國《太陽報》報道，紐卡素目前財政處於「違規邊緣」，依家積極放售米基爾阿米朗、哥林威爾遜等球員，同紐卡素只剩1年半合約嘅哥林威爾遜，早前獲馬德里體育會提出借用，但紐卡素只想出售套現而拒絕，「喜鵲」近日就向曼聯、車路士、阿仙奴等球會主動兜售。

曼聯今個月一直想簽前鋒，收購賓施馬一事因人工過高而告吹，簽哥林威爾遜就成為黃金機會，紐卡素只要求1,800萬鎊轉會費，呢位31歲前鋒今季雖然因傷缺陣多時，但14場聯賽已入7球，入球數字多過晒曼聯任何球員，作為「短炒」增兵，都算係海倫嘅一個Upgrade。