艾迪巴約「戴帽」創紀錄　盧頓大勝爆125倍波膽

周三(31日)凌晨英超出現令人意外賽果，護級球隊盧頓主場以4比0大勝白禮頓，爆出125倍波膽，前鋒伊利亞艾迪巴約表現光芒四射，個人轟入3球，成為盧頓自1990年9月以來，首位喺頂級聯賽上演「帽子戲法」嘅球員。

盧頓發動閃電戰，開波1分鐘就由伊利亞艾迪巴約近門頂入打開紀錄，僅過2分鐘，奧賓尼單刀推過門將積臣史迪利，射入空門，為盧頓迅速領先2球。呢支新升班球隊得勢不饒人，繼續搶攻，並喺42分鐘由伊利亞艾迪巴約窄角度射成3比0。

換邊之後，伊利亞艾迪巴約頂入角球，完成「帽子戲法」，呢位身高1米93嘅26歲前鋒今季英超已經有8球進帳，表現令人驚喜。伊利亞艾迪巴約來自尼日利亞家庭，佢本身喺英格蘭出世，仲未有國際賽經驗，有資格選擇代表呢兩支國家隊，據悉伊利亞艾迪巴約傾向為尼日利亞披甲。

盧頓愈戰愈勇，各項賽事3連勝，加上同日英超愛華頓作客打和富咸0比0，盧頓今仗贏波之後升上聯賽第17位，暫時逃離降班區。