艾華利斯生日起孖　打破英超「壽星仔」紀錄

曼城保持強勢，喺英超主場以3比1擊敗般尼，各項賽事8連勝，比賽當日係「藍月亮」前鋒祖利安艾華利斯24歲生日，呢位阿根廷國腳梅開二度，成為英超史上最年輕單場入2球嘅「壽星仔」，收到最佳生日禮物。

養傷近2個月嘅曼城射手艾寧夏蘭特今場有份入選大軍名單，但先做後備，由祖利安艾華利斯出任正選箭頭，佢不負所托，開賽16分鐘接應馬菲奧斯紐尼斯右路傳中，近門頂入打開紀錄。

僅過6分鐘，奇雲迪布尼處理罰球，選擇以地波直傳，祖利安艾華利斯射入成2比0，呢位出生於2000年1月31日嘅射手，成為英超史上第10位生日比賽入2球或以上嘅球員，亦係最年輕一位，佢今季聯賽已有8球進帳。

換邊後僅1分鐘，洛迪卡斯簡迪勁射入網，曼城領先3球之後，大局已定，艾寧夏蘭特71分鐘後備上陣復出，雖然冇入波，但可以趁機「熱身」，為將來重拾射門鞋做準備。

般尼喺補時由後衞艾達希入波破蛋，亦係呢支新升班球隊近9次對曼城，首次入到波，總算挽回些少面子。