朗尼潮玩杜拜　下一站去沙特教波？

曼聯名宿朗尼早前被英冠球隊伯明翰炒魷之後，近日趁得閒同老婆麥露蓮去阿聯酋杜拜旅行，影咗唔少相片，並放上社交網。英國《太陽報》引述消息人士，指朗尼有興趣去沙特阿拉伯搵食，今次先帶老婆去中東視察環境。

38歲嘅朗尼掛靴之後，曾經執教打比郡、華盛頓聯隊、伯明翰，但都因為成績差被炒，消息人士指呢位英格蘭少帥仍然對教波充滿熱誠：「朗尼執教伯明翰雖然未盡人意，但佢認為自己學到好多嘢，以及需要改進，對於擔任教練充滿期待，亦希望有朝一日執教沙特阿拉伯球隊。」

朗尼之所以想去沙特搵食，可能受到另一位英格蘭名宿謝拉特啟發，「謝老四」教波生涯同樣失意於英格蘭本土，現時擔任沙特球隊伊蒂法克主帥，即使球隊成績一般，帥位仍然穩陣，而且獲得高薪。

加上昔日曼聯隊友C朗效力沙特豪門艾納斯，有大把老友照應，朗尼去到當地生活，應該容易適應。