羅馬無力負擔高薪　戴巴拿盧卡古今夏齊走人

意甲球隊羅馬換帥之後，成績有改善，但球會財政問題仍然嚴峻，為咗節省開支，今季結束之後，將會放棄兩位高薪名牌前鋒保羅戴巴拿、盧卡古，球隊前景唔樂觀。

羅馬2022年簽入自由身嘅保羅戴巴拿，上年夏天向車路士借用盧卡古，雖然兩單交易都免轉會費，但兩人年薪合共1,500萬歐元(約1.26億港元)，對於陷入財困嘅羅馬，造成沉重負擔。

意大利傳媒指，羅馬就算取得下屆歐聯入場券，都唔會續借盧卡古，同時亦會出售保羅戴巴拿。根據保羅戴巴拿嘅合約，由7月1日至31日進入「特價時段」，其他聯賽球會可以用1,200萬歐元買斷佢，呢位30歲阿根廷國腳今季為羅馬上陣21場入9球及6次助攻，功架十足，羅馬要搵買家應該唔難。

另外，盛傳沙特阿拉伯公共投資基金計劃以9億歐元(約75億港元)收購羅馬，如果成事，呢間老牌球會就可以解決財困，屆時保羅戴巴拿、盧卡古或者可以唔使走。