皮奧利獲贈100勝戰衣　主將齊撐佢留隊

意甲勁旅AC米蘭近期表現大勇，各項賽事近9場贏7場，上月作客以3比2擊敗烏甸尼斯，更加係主帥皮奧利執教A米以來，第100場意甲勝仗，成為球隊史上第4位獲得呢個成績嘅教練，會方近日隆重其事，向呢位58歲名帥頒發100號球衣及獎章作為紀念，相信佢嘅帥位愈來愈穩陣。

AC米蘭喺今屆歐聯分組賽出局，意甲爭標機會亦渺茫，一度盛傳會方計劃今夏換帥，包括睇中前車路士領隊樸達。不過，隨住「紅黑兵團」成績回升，換帥計劃開始有變。

事實上，AC米蘭今季踢24場聯賽有52分，比上季同期多5分，的確冇理由炒皮奧利，加上基奧特、拉菲爾利亞奧、迪奧靴南迪斯等主力紛紛表態，公開支持皮奧利留隊，相信呢位「光頭主帥」應該可以履行合約至2025年夏天。