羅夫度斯卓克重生　大爆發率AC炒雷恩

歐霸盃淘汰圈附加賽首回合，AC米蘭主場3比0大炒雷恩，近期狀態巔峰嘅英格蘭中場羅夫度斯卓克今場又入2球，佢轉型踢進攻中場後近5仗入5球，賽後豪言要挑戰個人生涯入球新高。

AC米蘭今場贏得輕鬆，出任4-2-3-1陣式「10號位」嘅羅夫度斯卓克，32分鐘接應傳中頭槌頂入，換邊後2分鐘再憑角球攻勢，羅夫度斯卓克又喺門前出現頂成2比0，加上拉菲爾利亞奧53分鐘入波，「紅黑兵團」大勝3比0，晉級相當穩陣。

羅夫度斯卓克近5仗入5球，呢位28歲中場表示：「我踢過中場唔同位置，但呢個位最啱我，因為好接近龍門，我正努力學習喺適當位置出現，依家踢得好享受亦好自由。」羅夫度斯卓克18/19球季效力車路士嗰陣，曾經單季攻入10球，佢今季已有7球進帳，佢話：「我之前最叻嗰季入10球，即管睇下破唔破到紀錄。」