殘酷2揀1　多蒙特要馬特臣棄辛祖

德甲勁旅多蒙特喺冬季轉會窗，由英超借用查頓辛祖同伊恩馬特臣增強戰力，雖然話題集中喺查頓辛祖，不過21歲左閘伊恩馬特臣似乎獲得更高評價。據報多蒙特如果要喺季尾買斷其中一人，將會優先收購伊恩馬特臣。

伊恩馬特臣青訓時代曾效力燕豪芬，轉會車路士後未獲重用，上月外借多蒙特後，6場聯賽全部正選上陣，日前仲當選埋德甲1月最佳青年球員，風頭更勝查頓辛祖。多蒙特門將基哥高保對佢亦有極高評價：「馬特臣踢法好聰明，好肯攞波同尋求解決方法，佢嘅爭勝心好強，非常出色。」

馬特臣喺外借前同車路士續約，入面有3,500萬歐元買斷條款，報道指多蒙特非常有興趣長留呢新星；至於另一借將查頓辛祖，預計曼聯亦會要求3,500萬歐元左右轉會費，但多蒙特未必能夠同時承擔兩單高價轉會，如果只能2擇其1，人工較平而表現更好嘅馬特臣將係心水之選。