恥辱性換人　安東尼99分鐘入場慶生日？

曼聯喺英超主場1比2不敵富咸，領隊坦哈格今場排陣有驚喜，19歲新星科遜首度喺英超擔正踢右翼，成功搶走貴價翼鋒安東尼馬菲奧斯嘅位置。更估唔到嘅係，坦哈格竟然喺99分鐘先至換入該巴西球星，汗都冇流一滴已經完場。

坦哈格賽前承認安東尼表現未符預期，今仗雖然係呢位翼鋒24歲生日正日，但坦哈格就唔畀面，寧願用19歲嘅科遜擔正，80分鐘換入翼鋒亦先用阿密特迪亞路，到富咸領先2比1嗰陣，坦哈格先喺99分鐘換入安東尼，作用當然係「零」，唔少球迷都指呢次換人對安東尼嚟講係「恥辱」。

坦哈格賽後解釋：「(遲換人)無關健康問題，唔似其他位置，我哋右翼有好多選擇。大家都睇到安東尼狀態(唔理想)，佢需要提升表現，而且科遜、阿密特迪亞路、阿歷真度加拿祖喺訓練嘅表現，都值得有落場機會。」