C朗猥褻動作反擊「美斯」 沙特足總調查
周一(26日)凌晨沙特聯賽，C朗拿度領軍嘅艾納斯，作客3比2擊敗艾沙比，有份入波嘅C朗完場後受到球迷高呼「美斯」挑釁，呢位葡萄牙國腳就做出疑似猥褻動作反擊，消息指沙特足總將會展開調查。
排第2位嘅艾納斯仍然有爭標希望，今仗作客艾沙比，21分鐘由C朗射入12碼領先，但主隊完半場前亦由恩歷克卡拉斯高射入12碼追平。換邊後艾納斯前鋒泰利斯卡梅開二度，終協助艾納斯險勝3比2。
完場後慶祝嗰陣，主隊球迷就高呼「美斯」個名，C朗即將手放喺耳邊，再伸手向下體做出疑似猥褻動作反擊。據沙特報章《Asharq al-Awsat》消息，沙特足總已展開調查程序，唔排除對C朗作出處分。