曼城新星續約至2029　人工三級跳

曼城正式宣布同翼鋒奧斯卡波比續約至2029年，據悉呢位20歲挪威國腳嘅人工，由原本12,000鎊(約12萬港元)，大幅增加至36,000鎊(約36萬港元)。

擁有岡比亞血統嘅奧斯卡波比2019年7月由挪超球隊華拉倫加轉投曼城青年軍，今季嶄露頭角，成名作一定係今年1月英超對紐卡素，佢後備上陣並喺補時冷靜射入致勝1球，協助曼城贏3比2，獲得領隊哥迪奧拿激讚，依家順理成章得到加薪續約。

奧斯卡波比續約之後話：「我非常自豪同榮幸可以同曼城續約，球隊嘅環境絕對係年輕球員夢寐以求嘅地方，我從哥迪奧拿身上獲益良多，並會繼續進步。」哥迪奧拿指奧斯卡波比技術全面，可以勝任翼鋒、前鋒、進攻中場，屬於不可多得嘅天才球員。