曼城半力再贏哥本哈根　創歐聯10連勝紀錄

衞冕嘅曼城再創紀錄，佢哋周四(7日)凌晨歐聯16強次回合，半力出擊下主場3比1再贏哥本哈根，兩回合合計大勝6比2晉級8強。曼城成為歐聯史上第3支「10連勝」球隊，亦係首支英超球隊做到呢個成績，氣勢如虹。

為留力周日(10日)作客利物浦嘅關鍵戰，曼城今場收起奇雲迪布尼、菲爾科頓、貝拿度施華等核心，不過實力超班下仍踢得好輕鬆，開波10分鐘內已憑文路爾艾簡治同祖利安艾華利斯入波領先2比0，雖然29分鐘被追番1粒，但艾寧夏蘭特上半場補時再入波鎖定勝局。曼城半場將洛迪卡斯簡迪收起進一步留力，換邊後雙方再冇入球，曼城輕鬆晉級。

曼城自上屆4強同皇馬打和後，喺歐聯已連贏10場，係英超史上第1隊做到，亦係皇馬(2014至15)同拜仁(2019至20)後全歐洲第3隊達成，領隊哥迪奧拿賽後表示：「我哋相信自己可以再贏冠軍，唔好忘記我哋要同皇馬、拜仁等豪門競爭，最重要係曼城已連續7年入8強，非常穩定，曼城已經逐步走向巴塞、拜仁等歷史勁旅嘅層次。」