拿玻里同K77傾續約　要求加薪3倍

拿玻里除咗域陀奧森漢吃香，身價過億歐元外，外號「K77」嘅射手基華拉斯基利亞都受到各大豪門注視，據報拿玻里準備同佢斟續約，人工將會3級跳，年薪由130萬歐元加到400萬歐元(約1,100萬港元加到3,400萬港元)。

《全市場》報道，K77經理人未有明確表示球員去向，但拿破里態度鮮明，只會收到難以拒絕報價才會考慮出售，K77現時年薪為130萬歐元，合約簽到2027年，雙方將於今夏開啟續約談判。

K77經理人已開出續約條件，就係要求年薪大增3倍至400萬歐元，獎金另計，而拿玻里則要求將違約金列入合約條款，以便有豪門斟介時可推高轉會費。

該23歲格魯吉亞前鋒上季加盟拿玻里，即協助球隊重奪意甲冠軍，兩季合共為拿玻里上陣78場入23球23助攻，同域陀奧森漢合作無間，其身價亦由買入時嘅1,200萬歐元，上升至現時《轉會市場》估價8,000萬歐元，PSG、巴塞、曼聯、利物浦都對佢有興趣，即使續約亦不愁出路。