阿迪達做「和事老」　勸賓韋特重返國家隊

阿仙奴後衞賓韋特今季表現出色，但早前拒絕英格蘭國家隊徵召，引起爭議，兵工廠主帥阿迪達出戰曼城前夕，充當「和事老」，勸呢位防線猛將為大局着想，重新考慮為「三獅兵團」效力，出戰今屆歐國盃。

阿迪達認為賓韋特仍有機會返回國家隊，佢話：「我作為領隊，希望球員獲得最好待遇，如果賓韋特有朝一日重返國家隊，當然最好，亦係對各方面最佳選擇，賓韋特嘅國家隊隊友都好喜歡佢，佢身邊充滿愛，希望佢準備好再次為英格蘭比賽，但講到尾都要尊重佢嘅決定。」

賓韋特喺2022年世界盃期間，因私人理由提前退隊，當時有傳佢同英格蘭助教賀蘭特不和，之後冇再入選國家隊，英軍主帥修夫基近日否認有關傳聞，仲話國家隊大門一直為賓韋特打開。賓韋特可以勝任右閘及中堅，如果可以重返國家隊，無疑可以提升英軍爭標實力。

另一邊廂，哥迪奧拿不滿修夫基用殘曼城球員，話對於中堅史東斯早前熱身賽對巴西、比利時都踢正選，感到難以理解，呢位守將「為國捐軀」受傷，將缺陣對阿仙奴。