湯馬士柏迪誓保最後機會：我想留喺阿仙奴！

加納中場湯馬士柏迪4年前加盟阿仙奴後，一直係球隊靈魂人物，可惜經常受傷令佢難以被依賴，今季佢再次長期養傷，喺隊中地位已大不如前，盛傳夏天將被拋售。湯馬士柏迪日前受訪，表明心迹話想續約長留阿仙奴，未來1個半月衝刺將係佢自救嘅最後機會。

湯馬士柏迪上仗對盧頓正選上陣，係佢相隔半年後首次喺擔正，隨住佐真奴、迪格蘭賴斯加盟，湯馬士柏迪重要性大減，不過佢就堅決留效：「我一直都想留低，阿仙奴係我選擇嘅球隊，每次落場我定3好開心，我知道外面有好多傳聞，但我好希望一直留隊。今季仲未完，我嘅目標係盡快回復最高水準，每場比賽都可以候命。」

30歲嘅湯馬士柏迪同阿仙奴合約明年夏天屆滿，據報領隊阿迪達希望再簽一名頂級防守中場，目標包括皇家蘇斯達嘅蘇比文迪、阿士東維拉嘅杜格拉斯雷斯同愛華頓嘅阿馬度奧拿拿，湯馬士柏迪將會被兜售套現。