蘭歷克證實拜仁斟介　一個要求成關鍵

德甲勁旅拜仁慕尼黑失落聯賽冠軍後，正積極物色新帥代替季尾離隊嘅杜曹，前曼聯領隊蘭歷克日前證實，佢已收到拜仁嘅斟介，而且表明「有得傾」，大有機會成為拜仁新帥。

依家執教奧地利國家隊嘅蘭歷克證實：「拜仁已經同我接觸，我亦上報奧地利足總。」被問到有冇興趣接手，蘭歷克就回應：「如果拜仁話要我，我會問自己想唔想要？如果我決定行另一條路，我會先通知奧地利足總。」

蘭歷克喺德甲享負盛名，除咗做教練之外，近年更多時間做足球顧問，掌管成間球會嘅發展方向。權威記者Fabrizio Romano報道，蘭歷克對於薪酬並冇意見，重點係佢有足夠冇權力去帶領球隊，呢一點亦成為蘭歷克係咪加盟嘅關鍵。

蘭歷克亦開宗明義表示：「錢唔重要，我考慮嘅係其他。我係咪可以帶嚟改變？我有冇機會發展一支成功嘅球隊？不過我依家會專注奧地利國家隊，集中備戰歐國盃決賽周。」